新鴻基地產（00016）日前舉行咗個獎學金頒授儀式，共有十名員工子女獲得大學本科獎學金。不過全場最矚目，要算係主席兼董事總經理郭炳聯嘅一番自嘲式訓勉，佢話自己雖然分別攞到劍橋同哈佛頒授嘅碩士學位，但中、小學時讀書其實唔係咁努力，要阿媽督促同鼓勵先至有今日嘅成就。
郭炳聯回憶自己細個讀書時，一年要應付六次考試，但並唔係次次都溫好書先去考，試過「臨急抱佛腳」，考嗰日嘅大清早至嚟溫習，不過就要靠阿媽晨咁早叫佢起身溫書，郭老太果然一如傳聞對子女盡心盡力，每日好似鬧鐘咁準時叫醒佢。
郭炳聯仲話，自己重視教育，係受父母嘅影響，到今時今日都十分感激媽媽經常鼓勵佢努力讀書，希望各位獲得獎學金嘅同學都要努力，日後報答父母。
講番新地個本科獎學金，經已係第三年舉辦，今次獲得獎學金嘅都係基層員工子女，有廚師、花王、保安員等，十名得獎年輕人修讀嘅本科包括醫科、語文、歷史、測量學等。所謂肥水不流別人田，郭炳聯除咗祝願佢哋學以致用，仲鼓勵佢哋暑假申請到新地做實習。
余詩韻