絲絲講場：肥仔岳公司爆跳船潮

絲絲睇番啲資料，淨係董事「離任潮」就夠嚇人。由舊年九月開始，呢個潮真係停不了，就連服務多年嘅資深董事都「分手」。好似做咗豐德麗（00571）董事達七年嘅唐家榮，決定一次過辭去所有豐德麗職務，包括副主席、獨立非執行董事；同日講BYE BYE嘅仲有梁綽然，佢都係資深董事，做過豐德麗執董及行政總裁，之後轉做非執董，同唐家榮一樣選擇辭任；選擇退任嘅張永森，做過六年豐德麗執董、十六年麗展（00488）執董。

跳船嘅又何止董事，系內股東都有減持。有「女股神」之稱嘅西京投資主席劉央，今年中減持業績差劣嘅寰亞傳媒（08075）6,600萬股，呢個「減磅」行動引起市場關注，證券界估計佢會繼續減持。長期股東余卓兒及余少玉亦「減磅」，佢哋喺呢兩個月，大手減持麗豐（01125）同麗國（00191）股份。

系內公司近期舉債65億

豐德麗和麗豐仲諗住喺橫琴搞文化產業項目，兩家公司加埋市值不足50億元，但總投資達180億元人民幣（約220億港元），市場恐怕兩家公司有沉重資金壓力。

事實上，系內公司近年頻頻舉債及向市場伸手，先有麗展及麗豐供股；後有麗豐、麗展及麗國向銀行貸款，涉及金額合共65.5億元，難怪令市場擔心麗新系利息支出。

高價投地 恐「富麗華翻版」

麗展高價投得將軍澳地皮，更惹起地產界議論紛紛，佢哋話麗展「摸頂買貴貨」有前科，今次恐怕係「富麗華翻版」。九七年樓市高峰期間，麗展斥資69億元高價買入中環富麗華酒店重建，結果金融風暴後，樓市顯著下挫，麗展九九年仲勁蝕68億元。

余詩韻