分析員嘔心瀝血嘅證券報告，係唔少投資者嘅明燈，但恒隆（00101）董事長陳啟宗（Ronnie）就好唔欣賞，仲話依家分析師嘅水平「低得可笑」。
為乜佢咁嬲？皆因早前有份報告，話內地商場競爭激烈，恒隆（00101）旗下瀋陽商場出現供過於求迹象，又有報告話佢哋喺內地商場嘅地點最差。咁講法，Ronnie條氣真係好唔順，佢反駁話，新世界創辦人鄭裕彤同恒地（00012）主席李兆基，都曾經讚過恒隆喺內地商場選址好，所以佢覺得嗰份報告真係天大嘅笑話，仲叫咗嗰個分析員寄100份報告畀佢，等佢可以派畀投資者，當然最後都無咗件事。
另外，早排公司嘅兩名老臣子姚子賢同高伯遒突然辭職，Ronnie話，恒隆業務一向清晰，所以都唔會有意見唔一致嘅問題。依家公司已經有一個董事接管咗新項目方面嘅業務，另外又有三個同事接管建築業務。絲絲問Ronnie依家有新執董人選未，佢話董事會會研究，會唔會安排佢嘅其他家族成員入董事會，佢就無回應喇！