滙豐銀行搞咗個全城優質服務獎終於揭盅，喺逾三十萬人參與投票下，你都咪話冇代表性。最終係由旺角彌敦道分行喺大行中拎到「最優質銀行服務獎」，其中絲絲對一個客戶經理（RM）同婦科醫生嘅故事特別深刻。
話說嗰名婦科醫生已經係滙豐銀行十二年客仔，兩年前，醫生想送小朋友去英國留學，但佢可以話係一籌莫展，咁啱畀旺角分行一個曾經留學英倫嘅女客戶經理知道咗，佢就自告奮勇，用私人時間同醫生分享其經驗。故事仲未完，客戶經理後來有咗龍b，仲專登搵番嗰位婦科醫生幫佢接生添！
聽講，佢哋建立咗互信關係，呢位醫生經常介紹生意畀嗰個客戶經理，能夠幫公司搵到生意固然值得嘉許，絲絲最感動嘅係呢位客戶經理願意付出自己嘅私人時間，拎個心出嚟幫客戶解決問題！
最近有消息話，滙豐已決定咗明年員工嘅薪酬加幅，滙豐發言人就「no comment」。不過絲絲收到風，滙豐明年整體薪酬開支加幅介乎約2.5%至略高於3%，閣下攞唔攞到呢個數，就要睇表現喇，表現好好嘅，又可能高過呢個數都唔定O架。