二○一二年剩番唔夠半個月就bye bye喇，係時候回顧一下呢一年嘅喜與憂。尋日絲絲率先問渣打香港嘅執行董事及行政總裁洪丕正（Ben）呢個問題，佢好坦白話今年佢嘅銀行業務有「驚喜」，即係有驚亦有喜，「喺夏季嘅時候都有過驚險嘅事，但係都迎刃而解」。Ben好口密，唔講乜事，令平日處變不驚嘅佢都要「心驚」。絲絲就估同母行嘅違規事件有關！
美國就住違反打擊洗黑錢法例，咬住滙控（00005）同渣打集團（02888）唔放，最終用錢解決問題。以渣打為例，今年八月畀美國紐約州金融服務局（DFS）指控，違反打擊洗黑錢法例，平日渣打集團嘅負面新聞甚少，可想而知事件嘅震撼性，最後渣打要向DFS支付3.4億美元（約26.5億港元）和解費，件事先收科。如果阿Ben係指呢件事，就真係幾驚吓。
新一年快到，佢希望香港經濟一年比一年好，皆因過去幾年嘅經濟都認真麻麻，另外佢仲想每日打開報紙，睇到多啲正面嘅消息，因為會好影響嗰日嘅心情，同埋食早餐嘅食欲咁話喎！
罰款單嘢算係解決咗，尋日阿Ben約埋一大班朋友，預早慶祝聖誕，佢仲大派禮物兼親身落場玩遊戲，希望新一年大家事事暢順啦。
余詩韻