孖妹S檔案：「鱷鬥」連場悟贏錢心得

鄭：科技大學工商管理學院財務學系兼任副教授鄭樹英

跟風入市「輸凸」買教訓

彩兒： 美國華爾街係滿布金融大鱷嘅心臟地帶，當年你身處其中，有咩所見所聞呢？

放大圖片

鄭樹英

　鄭：這就要重提我大學畢業後嘅第一次投資經驗，當時我個秘書極力推薦我買入一隻醫藥股，說一定能夠賺大錢，因為這間製藥企業新研究出一隻新藥物，幾乎可以醫治所有類型嘅癌症，實驗室測試初步發現結果有效，只欠政府批准就可對外出售。當時我嘅銀行戶口有3.2萬元，而我就用咗1.6萬元買入該股，誰知其股價在兩周內由100元升至150元，後期更高見200元，令我不斷怪責自己：「點解唔再入市追貨呢？真是個笨蛋了。」

不過，好快政府就發表聲明，話呢隻抗癌藥物有太多副作用，未能獲准生產和發售，此消息即令該股股價暴跌，從200元急跌至50元。我驚起來，就立即沽貨止蝕，最後輸咗8,000元。呢次失敗令我明白投資股票不能只聽消息，因為你永遠都唔知道發放消息嘅人係邊個？有何目的？

高妹： 你出嘅著作都有寫金融大鱷如何對外「放風」令小散戶上釣（見表）！但有人話，本地不少「財經演員」都會幫大戶放料，咁小散戶咪唔應該相信佢哋？

　鄭： 我認為每個財經演員能夠上財經節目，在報紙寫專欄，其對金融市場確有認識，我亦相信他們是專業的。但我有另一個睇法，財經演員嘅最大用處，並不是提供大市看法，或者股票貼士，而是透過其言論，第一，提醒小散戶一些市場上最快最新的資訊；第二，幫小散戶印證自己對於大市或者股票嘅熟悉程度。因為只有當你最懂一件事情時，你才有能力去分辨別人關於這件事嘅睇法是對？是錯？還是有所不足之處？

炒作猶如打羽毛球

彩兒： 教授講得有道理。自己夠聰明醒目，咁就自然唔會畀人「放料」搵笨喇！

　鄭： 其實投資同打羽毛球差唔多，兩者都非常講求Focus（專注），即投資時要專注於股票分析，打波就當然係專注個羽毛球啦。因應環境和形勢去看準目標，你自然知道幾時買賣，幾時接球。不過，小散戶在股市嘅自由度很大，如果市況不就，個人投資信心唔夠，大可靜觀其變，延遲入市買賣；入市後，亦可因應股價變化而決定止賺止蝕，控制盈虧風險。之但係，你去打羽毛球呢，別人將個球打畀你，你唔接的話，場波就會輸。因此，小散戶在投資市場並唔需要心急，慢慢打，蝕錢機會自然減少。

高妹： 係喇，聽講你在華爾街工作時，會用36個指標去研究一隻股票嘅價值，但小散戶只要識得5個就夠晒數，點解呢？

　鄭：我講過投資最重要就係「專注」，基於各行各業嘅經營環境、賺取回報、風險等結構均不同，故散戶根本不可能全部都去睇去識，因此股票係唔需要睇太多隻的，集中研究3至5隻你有興趣嘅，長期觀察及跟進這些股票行業嘅變化、經營架構、盈利增長等資料，等了解熟悉後，個人亦有投資信心，就可入市買賣。你記住，投資你並不熟悉嘅股票，結果永遠是輸多贏少。

盈利靠化妝唔易拆穿

彩兒： 謹遵教授之言。但我就有啲唔明白，點解你提出嘅5大指標，有毛利率、銷售增長率、負債/淨值比、核心業務的淨現金流量，以及核心業務的淨現金流量/總資產，卻不包括盈利嘅？

　鄭： 以前我在摩根大通工作，就係負責企業融資，在審批貸款過程中，我看過好多企業嘅財務報表，試過發現有些企業嘅財務數據非常好睇，但後來卻突然申請破產，才知企業可透過財技去美化盈利等數據。我話你知，即使智商「爆燈」嘅行內人士都未必能發現當中財技，更何況是普通小散戶？反而，以上呢5個指標就可以反映一間上市企業嘅真實財務狀況，幫你判斷其未來盈利增長之可能性。

高妹： 唉，小散戶都係飛唔出金融大鱷或者大鱷企業嘅五指山喇！

　鄭： 當然唔係喇！打羽毛球有打羽毛球嘅規則，投資市場亦然，只要你去遵守，知道不同金融產品嘅玩法，有做足功課，又有判斷力，要在股市與大鱷共舞並唔係難事。仲有，記住投資無壓力，賺錢先會輕鬆，身體先會健康呀。

鄭樹英小檔案

現職：科技大學工商管理學院財務學系兼任副教授

學歷：美國明尼蘇達大學工程學士學位、美國聖路易斯大學金融工商管理碩士

工作

經驗：曾在紐約摩根大通國際銀行擔任副總裁，負責企業及房地產貸款和相關投資業務；紐約大都會（Metlife）人壽保險公司任首席投資執行官，管理總值125億港元的多元化及多類型資產投資組合

著作：鱷口下的賺錢術

高妹、彩兒

若有料報畀高妹同彩兒或有嘢問，可電郵money.biz@opg.com.hk