絲絲講場：德拉吉一句風雲之最
歐洲央行行長德拉吉七月份拍晒心口話，要盡地一煲保住歐元，真係唔講得笑。歐豬國債息口壓力即時紓緩之餘，德拉吉近日更因此獲英國《金融時報》選為年度風雲人物，讚佢為歷時三年嘅歐債危機帶嚟轉捩點。絲絲真係戥德拉吉高興，捱到氣咳都抵番晒啦！
推動OMT 歐元翻生
德拉吉發表完捍衞歐元言論，又推出公開貨幣交易（OMT），有條件地無限量買債，出盡法寶救歐元。結果，OMT推出咁耐，暫時都未有歐豬國排隊申請，意大利以至西班牙嘅債息仲明顯回落添，市場亦重新對歐元有番信心。德拉吉做到咁嘅成績真係殊不簡單，尤其係德國央行行長魏德曼同佢鬥硬頸，紮晒馬反對買債，德拉吉都無有怕，勇字當頭，同魏德曼公開駁火，仲成功拉攏德國總理默克爾企埋同一陣線，認真叻仔。
做好準備 長期作戰
咁德拉吉覺唔覺得自己係歐元區英雄呢？佢好謙咁話，今年係歐元區重新出發嘅一年，六月歐盟峰會各國對財政聯盟等措施達成共識，先係最關鍵。歐債問題有排未斷尾，但吊頸都要抖氣，德拉吉只係笑笑口話要繼續向前看，一早做好長期作戰嘅準備。
余絲韻