隨着城市繁榮發展，人口變得密集同社會物資過剩，嚟緊嘅問題就係垃圾太多啦。社會繁榮同垃圾似乎有如光與影同步昇華，一世都搣唔甩。但祖國最叻就係參考別人嘅經驗，做過改良為符合國情嘅政策或者配套，到最後反而比人行先一步成功，而參與祖國垃圾處理嘅先鋒當中就有光大國際（00257）。
既然垃圾問題係無可避免，自然就要提上日程盡早處理。於是喺「十二五」規劃中，點名要重點處理垃圾「無害化」問題，而中央拍板利用垃圾焚燒發電方式去處理垃圾，既無害化，又減量化同資源化，簡直係雙贏。垃圾焚燒產業得到資金和政策嘅大力支持，而光國作為環保行業龍頭之一，自然可以受惠。
光國致力打造成為綠色工業龍頭，管理層話今年底前將有一個垃圾發電同兩個水務項目建成，意味相關建設收入可明年入帳。加上手頭上9個垃圾發電項目之中，有7個已經開始動工，可以帶動未來兩年建設費收入進一步增加。同時公司對佢嘅垃圾發電項目十分有信心可以符合政府嘅排放要求，攞到發改委嘅電價補貼。
當然，光國食正環保國策，前途理應一片光明。不過，Prof. J認為綠色工業始終都係新興產業，由革命到進化從來都係一條長命斜。依家光國就好似買咗個期權咁，要等佢儲夠經驗值同時間值，才能「一遇風雲便化龍」。繼續追蹤，出發！
香港大學電子金融服務榮譽助理教授 徐燦傑