「蘋果教主」喬布斯逝世一周年，絲絲到依家都仲係好懷念佢。其實唔單止喬布斯，美國矽谷一班科網界巨子都係絲絲嘅偶像。諾貝爾經濟學獎得主克魯格曼（Paul Krugman）日前就畀一位記者問起點睇一班科網界偶像，估唔到佢竟然反其道叫大家唔好咁盲目崇拜嗰班科網界尖子。
克魯格曼話大家有時想像到班科網界巨子太美好喇，搞到佢哋個個都好似偉人咁，誇張啲講佢哋頭上簡直有光環咁。克魯格曼覺得大家有需要反思一下，今時今日嘅科網界同科技新產品係咪真係咁百利而無一害？
大家唔好誤會克魯格曼，佢唔係想叫大家罷用科技產品，佢本身都不知幾咁鍾意用iPad煲演唱會，佢只係想令大家反思一下，科網界嘅貢獻未必係大家想像到好似靈丹妙藥咁，就好似蘋果公司，其實唔係製造咗好多就業機會畀美國o架咋。