絲絲講場：港交所數據公司「滬」惠互利

繼成功收購倫敦金屬交易所（LME）呢單「世紀交易」後，港交所旗下主力做內地市場數據嘅公司，日前亦都喺上海正式開張，上個禮拜五仲喺上海舉行咗一個揭牌儀式，上海市金融服務辦公室主任方星海都有畀面出席。

大家都知，喺金融發展領域上，大家好鍾意將香港同上海比較，其中方星海過去更加係積極推動喺上海搞國際板，香港難免受到競爭同衝擊。今次方星海畀面出席港交所內地數據公司揭幕儀式，顯示港滬兩地其實係「好兄弟」！

事實上，今次港交所喺內地成立市場數據公司係互惠互利。港交所將會喺上海推出市場數據樞紐，屆時內地資訊供應商將可直接從港交所取得港股實時市場數據，估計內地將來亦同樣可以喺香港推出市場數據樞紐，香港股民可以睇到內地股市數據。

當然依家未有「A股直通車」，本港散戶唔可以直接買，但總要為未來兩個市場「互通」做準備。港交所依家就預計一三年第三季喺上海推出市場數據樞紐。

余詩韻