辛苦搵來自在食。投行中人平日做嘢冇時停，周末周日梗係要周圍搵好嘢食慰勞自己喇。好似瑞信香港認股證及牛熊證銷售主管何啟聰（Ivan），大家可能聽佢推介窩輪就多，但原來佢都好識飲識食，近月仲寫埋食評添。Ivan好坦白講，「住」以外，「食」嗰部分係佢每月嘅最大開支，逢周日必到未去過嘅餐廳試新菜。
究竟點樣揀到好嘢食，唔令自己有個失望嘅周日？Ivan話睇相好緊要，仲好自信咁話望落去就大概知好唔好食。絲絲心諗，除咗揀輪要金睛火眼睇清條款，唔通食好嘢都要先望真啲？
Ivan解釋，自己會參考唔同飲食雜誌、網站上嘅相片，如食物夠唔夠新鮮（尤其日本菜）、食物嘅擺放有否心思、以至餐廳為食物提供甚麼配料作配搭等，都可反映出廚師對食物嘅質素有幾高要求。好似天婦羅咁，佢話高質素嘅食肆係會提供唔同嘅鹽（如綠茶鹽、咖喱鹽）畀食客配搭，而唔單止係一般嘅天婦羅汁同蘿蔔。
不過，大家唔好以為佢唔貴唔食，其實佢其中一項揀食肆嘅條件，就係專搵品質高但價錢實惠嘅食肆，即所謂超值之選。所以逢周六，佢都會幫襯自己去開嘅老店。至於近排米芝蓮出咗新一批推介食肆，部分Ivan都有去過。不過，佢就話米芝蓮推介嘅日式餐廳唔多，但香港人鍾意食日本菜，應該要發掘多啲喎！