Market Insight：安踏體育 值得憧憬

市場共識是，熱錢主要流入股市，可是在過去幾日，港股連續五天改寫今年高位紀錄，實際點數進帳卻似有還無，上升動力有減弱趨勢。客觀睇，大市自今年六月四日18,056點起步，升勢歷時六個月，短期美國面對海嘯以來最大單一議題財政危機，明年一月一日財政懸崖過關與否，調查中九成基金經理感到樂觀，俗語話：唔怕一萬最怕萬一，惟有求神拜佛今次千奇唔好爆大冷門。

昨日港股升47點報22,323點，主板成交592億元，乃過去五日以來最少，傳統被視為賭徒雲集的期指市場，更清楚顯示唔少炒家高掛免戰牌，十二月期指成交，自上星期高峰9.2萬回落至昨日的5.4萬張（是上月二十七日轉倉高峰後最少），值得安慰是未平倉合約未見大幅減少，從上周三高峰期13.1萬，回落至前日12.9萬。

放大圖片

放大圖片

炒家靠邊站，但好友未有大減磅，展望今年進入倒數階段，今晚聯儲局會議，應就即將完結的扭曲操作結案陳詞，如果沒有太大驚喜，港股可能提早進入年底前膠着的悶市。

內房股終見回吐，但同缸邊流傳有幾間搵緊投行部署趁高「伸手」無關，眼見升幅唔少，加上已經達到目標有餘，野村報告建議客仔喺聖誕前沽貨鎖定利潤。

起步遲過人的人和商業（01387），跌得早過人！昨插5.5%，華潤置地（01109）、越秀地產（00123）、世茂房地產（00813）跌幅都超過3%。日前因為國壽集團增持消息，人和被追落後炒高，睇怕後者真係價值投資鼻祖格拉罕的忠心信徒，唔平唔買。

追寶尾不宜揀恒盛

繼人和後，昨日港交所（00388）權益披露，上周四原來仲入咗另一大落後內房恒盛地產（00845）700萬股，持股量增至5.52億股或者7.08%，可惜恨鐵不成鋼，恒盛十一月銷售數據按月大跌36.7%，套現得5.6億人仔，首十一個月累積售樓金額103.5億元，得番一個月，同130億元人仔全年賣樓目標距離咁遠，真係想搵理由追吓寶尾都唔易。

市場繼續發掘落後股，終於輪到市場極為忌憚的體育用品股。前日飯局，古勝認識一位協助幾個品牌上市的賓架，佢認同體育用品短期已差不多，認為今日股市睇到，品牌顧客忠誠度低，價格競爭相當激烈，算是一眾品牌真面目。

聽落相當風涼，至少同賓架及私募基金股東，當年用「中國Nike」、「增長無限」等的花紙包住賣畀股民時有很大的出入。今年內地零售市道麻麻，國際品牌也降格，打着七至八五折促銷貼字，對國內品牌壓力非輕。現時內地品牌，舊貨二至四折，新貨七至八折定價，是相當普遍，龍頭股安踏體育（02020）第季三同店銷售有中單位數跌幅，一三年第二季訂單減少15至25%，首季則減少20至30%，是輕微改善？抑或無咁差？不過是字眼問題。

由緩慢接單改善幅度推算，較樂觀業績轉捩點在一三年中或後期出現。安踏今年股價最低位，在七月的4.03元，符合股市走先三至四季的傳統想法，再睇20間大行出報告，叫買得5間，一窩蜂唱淡下股價不跌，看來安踏等的，就是一季度訂單出現持平甚至反彈。

內銀股係時候接力

昨日開始見到內房股發軟蹄，惟熱錢不斷湧港，唔多唔少都去咗金魚缸，要繼續踢高指數搵快錢，相對落後嘅內銀板塊應該可吸引炒家目光。

昨日民行（01988）股價創52周高位，就博嚟緊內銀股排隊上試52周高位，頭兩位最值博嘅係中信行（00998）同交行（03328），現價距離52周高位分別尚有20及14%上升空間，而招行（03968）及農行（01288）同約有13%上升空間，而最唔值博嘅係中國銀行（03988），現價離52周高位3.45元不遠。

古勝