十一月尾上市嘅翠華控股（01314），話咁快就公布埋首份中期業績，中期純利增長38.8%，營業額升35.7%至4.87億元。真係貫徹佢哋「快、靚、正」嘅服務宗旨，不枉Prof. J每個禮拜都去tea一tea。
喺成本控制方面，集團嘅食品、員工同租金開支佔收益比例仍維持同上年同期相若；EBITDA亦較去年同期增長40.2%至9,790萬元。翠華唔單只「魚蛋稱霸、咖喱稱王」，佢哋仲不斷有新搞作，譬如以全新品牌「至尊到會Supreme Catering」開展到會服務，啱晒呢輪開「趴地」同搞活動用。而旗下部分茶餐廳亦開始推出外賣仔服務，以推動業務增長，擴大香港嘅市場覆蓋同擴闊顧客層面。
除此之外，集團亦繼續擴展中國內地業務，並已經喺上海同武漢插旗，開咗兩間新餐廳。中期業績顯示，內地業務收益飆升91.1%至8,040萬元，佔集團總收益比例升至16.5%。為咗加強滲透內地市場，集團採取「軸輻式」（hub and spoke）拓展策略，會喺上海近郊揀一啲適合設立中央廚房嘅地點，以支援集團喺長三角擴充店舖網絡。同時，集團亦開始啟動珠三角建立店舖網絡嘅計劃。
要成功經營連鎖式茶餐廳，翠華喺香港做得好出色，但要走出香港，就必需依靠經驗豐富嘅管理團隊，配合成效顯著嘅標準化營運模式，不斷複製並擴展。茶餐廳係香港特色，Prof. J亦好期待翠華能夠將茶餐廳文化帶出香港發揚光大。繼續追蹤，出發！
香港大學電子金融服務榮譽助理教授 徐燦傑