邢李(火原)回朝思捷（00330）後，非執行主席柯清輝尋日第一次公開見人，佢重申話冇聽到邢生重返董事局嘅要求，但就歡迎佢返嚟！話口未完，思捷尋晚就公布「高薪」委任兩個猛人做獨立非執董。
柯清輝尋日係第一次以主席身份主持思捷周年股東會，總算對股東有個交代。有邢李(火原)坐鎮，思捷股價當堂醒神晒，最近又傳張松橋、鄭裕彤（彤叔）都有份買思捷，其實大家都知呢啲名人都係柯總嘅多年老友，買番啲捧場真係唔出奇，「張生（張松橋）係我其中一個好朋友，尋日仲喺酒樓撞到，不過各自約朋友食飯，冇點傾過偈，張生入幾多就要問番佢本人嘞。」
但一問到邢生會唔會增持，柯總就即時好大反應：「呢啲咁敏感嘅問題都唔應該問，如果我問佢就戇居，就算佢增持都唔會話我知啦！」柯生仲話歡迎任何人喺自由市場買思捷股份。
至於兩位新請嘅獨立非執董，相當有來頭，其中Norbert Adolf Platt喺奢侈品行業有40多年經驗，係國際品牌歷峯集團前行政總裁，而鄭李錦芬係前安利公司執行副總裁，曾兩度入選「全球百位最具影響力女性」，董事袍金亦同樣唔嘢小，盛惠每年66.5萬蚊，多過好多其他公司獨立非執董幾倍！
不過，絲絲喺股東會上見到好多公公婆婆，聽講好多喺百幾蚊時入貨，依家惟有焗供溝貨，所以希望思捷做好佢！
另外，柯總最近加入TVB（00511）做非執董，佢謙稱對電視業務唔熟，不過已出手做「說客」，要求政府喺發免費電視牌時增加透明度。
余詩韻