Market Insight：內房股折讓吸引
華爾街賓架對財政懸崖傾向樂觀，相信最後有驚無險，前晚道指重返萬三點關口，不過，科技股組成的納指卻逆市跌0.8%，純粹因為一隻巨無霸蘋果公司累事，單日插水約6.4%，收報538.79美元，再回顧九月嘅高位705.07美元，市值蒸發四分之一。
近期蘋果公司負面傳聞確不少，iPhone 5面板生產良率極低，供貨緊張傳要提早改設計推5S趕客，教主Steve Jobs離世後，IOS全球市佔率增長持續跑輸Andriod，最近連facebook都宣稱為客戶族群使用體驗着想，鼓勵旗下員工轉用Andriod手機。
蘋果公司光環漸褪
為保江山，蘋果CEO Tim Cook急謀對策，iPhone 5下星期登陸中國，最弊因為分成及補貼傾唔妥，遲遲仲未同坐擁7億用戶的中移（00941）合作，尤其中國聯通（00762）手機補貼累到業績走樣，中移高層李躍近日出來劃清界線，向分析員指雙方洽談有距離，短期未可落實合作，蘋果公司要搵中移催谷銷情的如意算盤短期打唔響。早兩個月，四圍叫人沽空蘋果公司搵食的商品大王羅傑斯，終於都威番一次。
講番個市，急升後港股橫行整固，昨日恒指跌21點報22,249點，指數無乜睇頭，內房股表現一枝獨秀，早前，恒大地產（03333）公布十一月售樓數據，單月銷售117.9億元（人民幣‧下同），十一個月累計846.3億元，提前達到800億元目標，股價已見異動抽穿4港元關。昨日另外兩隻內房照辦煮碗，建業地產（00832）及花樣年（01777）達標消息，也刺激股價急升8.8%及6.3%。
建業十一個月合同銷售93億元，已高出全年目標3億元，花樣年連同十一月9.79億元銷售額，累積71.74億，僅差兩千多萬就到72億元目標。
搵到份新鮮熱辣報告，目前，內房股股價較資產平均有44.7%折讓，龍頭華潤置地（01109）、中國海外（00688）折讓單位數字之外，其實唔少超過六成折讓的較落後選擇，例如合生創展（00754）、恒盛（00845）、恒大，以及剛提過的建業及花樣年，在熱錢追捧內房股，並由一線流向至二三線的趨勢下，幾隻都有留意必要。
人保集團（01339）今日掛牌，聽聞街外有證券行為幫阿爺做到好好睇睇，今次孖展相當鬆手，部分甚至將佣金盡歸經紀，目的催谷銷情。
領匯再跌水位有限
昨日睇分配表，認購200萬至7,000萬股的乙組「大飛」，分得幾鬆手吓，一視同仁個個9.03%，意味做大過11倍孖展，今日唔科水就要沽貨，尚幸前日個市同埋內險股齊齊大爆升，昨日聞得人保暗盤有幾巴仙進帳，今日唔使揩仲有餐茶飲吓，人保捧場客真係要去還神。
個市人人睇risk on，防守股份難免受罪，古勝至愛的領匯（00823）走勢認真麻麻，出個雙頂，仲兩日內由高位畀人隊低1.7元（港元‧下同）。管理層啱啱同分析員見面，透露下半年續租情況維持上半年勢頭（上半年升25.9%），未有受零售市道開始吹淡風影響，尤其是近期車位突然當炒，上半年領匯車位平均月租1,338元，假如私人車位租金跟住車位價升，旗下8萬個車位租金潛力都唔講得笑，現價41.2元，一三年息率3.8厘左右，零息環境下，相信再跌水位未必太多。
水務板塊鑊氣轉濃
呢期板塊輪流炒作，水務股冇咩點大炒，見近日隻北控水務（00371）升穿高位1.9元後未見太大回吐壓力，而隻中國水務（00855）同粵海投資（00270）都跟住郁郁哋，照計有得諗。
論人氣，北控水務依然係首選，短線大成交突破2元嘅話，應該仲未行完；至於中國水務，估值相對落後，但略嫌人氣未足；至於粵投，今年累升幅度不少，但公司除供水業務之外，亦涉足房地產業務，所以無謂估頂，喺熱錢流入之下，強者只會愈強。
古勝