香港人對「時間廊」、「眼鏡88」呢兩個品牌應該耳熟能詳，揸住佢哋嘅集團叫寶光實業（00084）。一直作風低調，但上星期突然有一番動作，為沉悶嘅市場帶來圈圈漣漪。
寶光公告發五年期可換股票據（CB），行使價為1.95元，籌集3.71億元。通常市場聽見上市公司要發CB，大多唔睇好股價，但今次少有地，寶光股價不跌反升，仲要重上一九九五年高位，真係跌到一地眼鏡，要去眼鏡88配返副新嘅，呢種亢奮程度簡直就好似有星級股東入股一樣。
雖然今次唔係正式入股，但星光熠熠嘅陣容已經令市場有無限遐想。寶光係向私募基金博裕資本發CB，CB持有人嘅目的當然唔係為咗啲息，而係希望將來股價做好，行使做股東啦。
不過，由於私募基金多數係投資落未上市嘅私人企業，所以平時好低調，未必知道博裕個名。然而，博裕資本其實大有來頭，牽頭人係江志成先生，前國家主席江澤民長孫。同時仲有好幾位財經界明星如張子欣、馬雪征、李嘉誠基金會等，卡士強勁。
今次咁大動作，Prof. J覺得一則為測試吓市場反應，睇吓用CB集資，市場點解讀；二則為「明星效應」，其實寶光都唔係為咗錢，反而Prof. J覺得係為咗增強市場對寶光嘅信心。市場希望星級人士可為寶光帶嚟協同效應，突破業務瓶頸位，同時借用博裕喺內地嘅良好網絡，幫集團喺內地大展拳腳。繼續追蹤，出發！
香港大學電子金融服務榮譽助理教授 徐燦傑