有「中國最牛基金經理」稱號嘅華夏基金前副總經理王亞偉終於重出江湖，除咗喺深圳前海成立資產管理公司，原來佢早喺今年七月都喺香港註冊咗間叫Top Ace Asset Management嘅公司，仲已經攞到證監會發嘅9號牌。
雖然佢喺萬宜大廈嘅寫字樓仲未裝修完，但絲絲聽講，佢近排好似已密密接觸啲私募大佬，仲喺深圳萬科浪騎遊艇會搞咗個小型聚會，準備全面復出。
王亞偉喺內地股民眼中直頭能點石成金，有風吹話，已經有幾個大戶湊夠廿億人仔交畀佢打理。有私募業者好坦白咁話，王亞偉離開華夏後，一路都有好多客戶主動搵佢，要搵廿億資金對佢嚟講真係話咁易。
絲絲最想知，由公募轉私募之後，少咗啲團隊支緩，佢仲保唔保得住以前嘅業績神話呢？