絲絲講場：馬雪征照起寶光
寶光實業（00084）股份交易一直都好靜，點知一係唔發市，一發市就唔係人咁品，上周五復牌後就連升兩日，股價再創一年新高，尋日逆市升足一成，兩日計更累升逾26%，市值急增5.75億元。咁威猛全靠公司搵到星級私募基金博裕資本做靠山。寶光主席兼行政總裁黃創增尋日放風，博裕董事長馬雪征同高盛前投資銀行執董黃宇錚會代表博裕，入局任公司非執董。
主理達芙妮有佳績
財經界鐵娘子馬雪征曾策騎聯想（00992）十七年，○七年加盟私募基金美國德太集團（TPG），喺○九年五月以TPG董事總經理身份入主達芙妮（00210），一年間已助其改善供應鏈、降低成本及存貨期等，將其起死回生。
舊年馬雪征離開TPG，更聯同平保（02318）前總經理張子欣、前中國國家主席江澤民嘅長孫江志成等猛人，合組星級基金博裕，連李嘉誠基金會都喺舊年四月靜悄悄投資博裕，就知呢個班底有幾堅啦。
寶光同博裕早就建立策略性夥伴關係，家陣又有戰績豐富嘅馬雪征御駕親征，就算黃主席手持嘅寶光股數可能被攤薄至48.22%，但可趁機吸取內地人脈、業務經驗及專業知識，條數點計都「抵番」啦。
余詩韻