港交所（00388）上個禮拜喺市場閃電式配股集資近十億美元，有晒充足彈藥收購倫敦金屬交易所（LME）。LME已成為港交所囊中物，一手促成呢單世紀交易嘅港交所行政總裁李小加自然獲論功行賞。
尋日港交所就公布，董事局已經撥出892萬元用嚟買港交所股份獎勵李小加。按尋日收市價122.7元計，買到7.2萬股。
李小加今年九月時續約港交所三年，已獲加薪7.5%，年薪增加到808萬，換言之，今次獎授股份嘅金額，已多過佢一年嘅底薪，認真和味。呢個仲未計年終嘅表現花紅，真係恨死隔籬！
睇番資料，李小加上年度嘅年薪、表現花紅同獎授股份等等，加加埋埋共收2,300萬元，今年佢仲搞掂LME呢單世紀交易，可以肯定收入更加豬籠入水。
李小加袋袋平安，港交所董事局都唔會刻薄員工，亦撥出一億港元買股份畀入選嘅員工，其中1,000萬元會預留畀明年新招聘嘅員工。
不過港交所今年業績麻麻，明年加薪幅度可能冇以往咁高，但都係有得加！港交所上下可以過肥年，但今次十二年嚟首次配股，政府有得「溝貨」，權益冇被攤薄，但散戶卻只能「齋睇」，高位「接火棒」嗰批更加係鬧爆，實在非常無癮，惟有希望股價生生性性！