絲絲講場：豪特REBRAND想後生啲

尋日絲絲見到佢哋CEO葉志禮，立即要問問佢點算。葉志禮話，未來幾年仍然係公司播種期，希望大家畀啲時間佢哋，仲話出年會重新包裝個品牌，將形象年輕化啲咁喎。

其實作為消費者，真係好難分辨OTO同佢哋嘅主要對手OSIM有咩實際分別。葉志禮就話，一路以來，OTO嘅產品都係重視內在美多啲，仲話行內人多數都覺得佢哋產品嘅功能得，只不過係包裝上就冇咁重視。

為咗同對手有更大差異性，所以佢哋決定明年開始會重新包裝形象（rebrand），唔單止產品設計，就連店舖裝修都將會有改變，而且仲諗住搵後生啲嘅代言人添。

內地55店將擴至120間

講到業務大計，葉志禮話會繼續增加內地分店，由依家55間，到出年三月就會增加到80間，再下一個財年就會有成120間咁多。到時相信公司喺香港同內地嘅收入可各佔五成，亦即係話，到時開始享受收成期。

絲絲記得，佢哋公司前排先話，希望五年先做到呢個目標，依家提前咁多，睇嚟佢哋對內地業務都好大信心喎。