之前有關思捷嘅傳聞，絲絲最唔相信嘅係前大股東邢李(火原)回朝，結果竟然真係發生咗。最近絲絲又聽到個消息，話思捷拎咗供股嘅50幾億之後，有一家外資基金打算將佢持有嘅零售品牌賣畀思捷，係真係假就唔知，但就真係有生意頭腦。
除咗呢單消息之外，絲絲仲會留意中央結算裏面嘅思捷持倉情況，事關資料顯示，思捷喺宣布供股前後，海通、金利豐同中南証券呢三間華資行代客持股量突然大增，供股完成後持股曾經有所減少，但近期又再度回升。
大客揸貨似未散水
絲絲查番星期一嘅中央結算資料，上述三間行持股仲有7.63%、1.49%同1.48%，似乎佢哋嗰班之前約10蚊低位入貨嘅大客，依家仲未打算散水。