十八大圓滿結束，雖然暫時未有任何實質利好內需政策出台，不過市場似乎已經「未出發、先興奮」，好多內需股都已經搶閘跑出，包括紙業股。
過去六個月係呢行最艱辛嘅日子，Prof. J唔敢講最壞時間已經過去，不過啱啱出咗中期業績嘅理文造紙（02314）不負厚望，有咁好嘅成績，佢哋管理層功不可沒。
受惠於今年夏季的造紙成本下降，理文中期盈利增長4.3%至6.74億元，兼派中期股息每股5仙；毛利率、存貨、應收帳、原料周轉日、製成品周轉日、應收帳周轉日等都有改善。做廠，最緊要貨如輪轉，出度貨、又收度數就最好喇。雖然公司內部不斷有改善，但點都要睇外圍經濟。
公司管理層雖然對前景比較審慎，認為行業仲係供過於求，不過，Prof. J留意到，整體產品價格喺九月已經升返啲，可解讀為行家都覺得有加價空間，咁理文嘅定價能力就會有好轉。不過，售價上升，可以有其他原因，譬如廢紙成本上升等，要睇埋下次份報告純利有冇增長。
只不過單睇公司素質，理文造紙嘅負債、經營現金流同盈利能力等方面都勝人一籌，而且人仔升值對降低紙廠嘅原材料進口成本有幫助，加上預期一三市盈率只得9.4倍，估值吸引。
不過，因為經濟環境仲未明朗化，每噸紙嘅利潤都無咁易返回最高峰時期。如果廢紙同煤炭成本急升，都會影響公司盈利。繼續追蹤，出發！
香港大學電子金融服務榮譽助理教授 徐燦傑