王朝酒業（00828）執行董事黃亞強同絲絲講，佢從事酒呢個行業，返工時無可避免要飲啲酒，原來放咗工佢都會飲少少。佢嘅生活已經離唔開葡萄酒，亦僅限於葡萄酒，傳統嘅白酒同啤酒佢唔會碰。
呢幾年內地飲葡萄酒嘅人愈嚟愈多，黃亞強話搞聚會時都只會飲葡萄酒，希望通過日常生活去影響更多人，佢仲發現身邊嘅朋友逐步改變緊以前只飲傳統白酒同啤酒嘅習慣。
佢話飲葡萄酒除咗可以提升自身生活，仲可以從中學習到葡萄酒嘅文化添。
黃亞強話內地白酒產量好大，不過高端品牌嘅供應渠道就好窄，只係集中咗去政府同軍隊度，市場上流通嘅好白酒並唔多，加埋呢幾年接二連三有白酒廠出咗品質問題，都反映出白酒呢個行業實在膨脹得太快。佢仲話，市場上流通嘅葡萄酒咩檔次都有，總有一款啱大家心水。