絲絲身邊好多老闆朋友經常呻話同Y世代（泛指生於一九八一至一九九四年）員工有代溝，唔知點樣同Y世代合作。顧問公司泰田、麥基爾國際就用咗差唔多三年時間調查，發現老闆以為最能將Y世代留住嘅兩個因素係「興趣及趣味性」同「金錢上的回報及利益」。但原來Y世代唔係一味講金o架，除咗興趣外，第二重要嘅係「清晰及可達到的職業路徑」。咦？老闆同Y世代喺職場認知上，真係有啲誤會都唔定。
不過，老闆同Y世代有一點係無咁大分歧嘅，就係Y世代喺職場上嘅特質，雙方都一致認為Y世代係「有創意」、「追求自由」、同「自我中心」，形象好清晰。老闆仲認為Y世代「欠耐性」，而Y世代就覺得自己「勤力」同「積極主動」。大家有些少偏差咁啦。
調查仲發現，Y世代既被認定為「有創意」同「追求自由」，老闆都以為Y世代希望工作上有大量自由，上司只須充當「協作式師傅」嘅角色。點知Y世代員工唔係咁諗，佢哋希望上司係「支援式師傅」，即係當佢哋需要人幫時，上司會喺左近出手幫忙！
個調查顯示，好多職場新鮮人，未係咁獨立，始終都想老闆同上司喺工作上畀多啲支持、指導同培訓；佢哋想要上司溝通時嘅即時回應，多過要爭取更多工作自由，等佢哋唔使經常做迷途羔羊亂試亂撞；不過，佢哋又同時希望喺工作上有更多參與度同決策權，又渴望參與決策過程喎！
老闆若果想同Y世代有效合作，不妨考慮一下調查報告嘅建議：同Y世代溝通時，盡量講啲簡單易明用詞；畀工作挑戰Y世代嘅同時，都要適當提供協助。最後梗係要講出口讚多啲Y世代。絲絲就話，邊一代嘅員工，都鍾意畀老細讚o架啦。老細，收到未？