吸取多元文化係擴闊視野嘅好方法，絲絲最鍾意同嚟自不同地方嘅人傾偈，以唔同嘅角度睇呢個世界。好似國泰康利資產管理（CCAM）行政總裁康禮賢（Mark Konyn）都話，搞基金投資最好都係有聯合國一般嘅團隊。
Mark哥雖然喺香港住咗好多年，但就唔係好buy本港基金公司嗰套，話望落去成team人背景好似，連學歷都差唔多，可能都係讀工程出身，學習喺相同嘅市況下買賣，做嘢模式好似「啤」出嚟咁。
咁，Mark哥又點請人？佢笑笑口一個字：「Random（隨意）！」佢話依家香港公司細，得十幾個人，投資團隊其實融合咗唔同文化與背景，有中國人、印度人、歐美人士，年紀最大嘅有25年經驗，後生嘅就只入行5年，佢哋同樣專業同有經驗，一齊腦震盪會擦出更多火花、有更嶄新更全面嘅諗頭。差距咁大，會唔會有代溝？Mark哥就話最緊要有開放嘅環境畀員工表達自己。絲絲聽聞佢公司成日開party，唔怪得之啦。
其實CCAM本身係合資公司，由台灣背景嘅國泰金融控股同美資資產管理公司Conning齊擁有。Mark哥今次擔大旗擴展，佢話自己享受挑戰，鍾意從冇到有嚟建立；而佢本身雖然嚟自西方國家，但咁多年來認識咗唔少亞洲文化，佢零舍啱做中西融合嘅公司。
以前喺倫敦做大學學者嘅Mark哥，當日一個人企喺大學辦公室，望住一齊做嘅前輩，突然醒覺自己將來唔想過咁嘅生活，咁啱嗰時環球金融業走向更專門、更技術性，佢覺得自己可以將技術轉化去投資，於是就好似由一張白紙咁再嚟過，完全係冒險王。