Market Insight：雅居樂追升有理

唔經唔覺，美國總統大選及中共十八大均塵埃落定，但係令到成個中環都係眼鏡碎的A股，遲遲未止瀉，滬綜指跌逾年半，由三千點碌落今日接近二千點水平，低位到咗未相信是近期最多人問的問題。

單睇安碩A50（02823）較指數溢價拉闊，以及投行QFII額度比早幾個月大減，可見由散戶到基金大戶，唔少已經上齊貨，無奈A股猶如未坐滿十六個乘客的小巴，只係聽到司機踩油，就係唔見開車。

放大圖片

放大圖片

瑞銀報告話，A股業績向下修訂周期持續十八個月，已平了○五年的紀錄。上市公司收入及毛利最壞時刻，預期接近尾聲，業績向上修定期，估計在明年第二季開始，如果股價跑在業績向上修定期的一季前，明年第一季會係入市黃金機會。

祖國股民信心待復

幾個月以來，古勝見到不少經濟師，估算A股上市公司業績轉角點會在何時出現，較樂觀的估今年第四季。查實，由九月初H股見底，國際投資者心目中，這仍然是主流想法。或者A股投資者實太悲觀，在漫長熊市中，要確認季績見底，才肯真金白銀重投股市。在下另一個指標，是上海A股昨日成交額331億元人民幣，創四年低位，印證要沽貨的，已沽得八八九九，刻下，可能就只差一份季績，催化A股股民恢復信心。

昨日港股高開走低之後，橫行悶到收市，新股翠華（01314）認真搶眼，一度高見2.68元，收報2.56元，比招股價2.27元升12.7%，以上限估值定價，平心而論成績算係唔錯。

內地樓市調控稍鬆

留意到翠華IPO街外七張大飛，每張1,500萬股份獲配91.6萬股（其中六個多2,000股），以多間行孖展收0.5至1厘計，收市價沽埋扣息兼使費，淨執26萬元認真和味。另外，翠華81份粉紅表（合資格僱員，百分百獲配），最瞓身伙記申請20萬股，帳面袋58,000蚊，確係好過出雙糧。

昨日超過十隻內房股創今年新高，中國海外（00688）及華潤置地（01109）兩隻基金至愛自然有份，世茂房地產（00813）、佳兆業（01638）及綠城中國（03900）等二線內房股亦榜上有名。

昨日飯局中，有基金經理認為即將公布的十一及十二月賣樓數字，對內房股無關痛癢，近期幾個投行大型中國經濟研討會之後，大孖沙密密吸內房股，大都是賭明年中國政府及人民銀行，對樓市壓抑措施只有一個可能，就是比今年寬鬆，不大可能較今年更緊，避免增加經濟緊縮過快風險。

中國海外及潤地已經跑先太多，假如未有貨的，不妨諗諗股價仲未創今年新高的其他選擇，本來恒大地產（03333）、龍湖（00960）及雅居樂（03383）都可以列入心水，可惜恒大走勢實在太不「合群」，或者同場外唔少衍生工具影響有關，龍湖受大股東夫婦離異拖累，可惜上周四、五反彈，差不多已回到消息前水平，雅居樂首十個月銷售僅達目標七成七，是影響股價未有跟升的原因之一，但相信消息已充分消化，追落後一於揀佢。

宏華有力從後趕上

市況喺高位整固，頁岩氣板塊乘機突圍而上，安東油田服務（03337）憑取得中石化（00386）服務合約嘅消息抽高，股價創52周新高2.93元，收報2.92元，逆市升11%；華油能源（01251）早前雖有主要股東減持，但無阻升勢，昨日創上市以來新高2.96元，收報2.9元，逆市上升5%。反而，宏華集團（00196）則跌一格，收報1.79元。若然安東同華油股價繼續尋頂，相信宏華亦有條件發力追上，挑戰52周高位1.94元。

古勝