國美電器（00493）上月底啱啱發盈警，業績又出埋，其中第三季虧損按季收窄至近1.9億元人民幣，同第二季比就無蝕咁多。咁代表國美係做得好咗，定係仍然咁差呢？Prof. J就覺得家陣國美情況唔係咁理想，一季數字嘅升降可以有好多原因，但最重要係睇公司嘅業務模式有咩改進。
依家普遍家電產品毛利率低，惟有透過「薄利多銷」，以量去盡量推高盈利來抵銷業務成本。但若果唔符合成本效益，對公司表現影響會好大。國美第三季綜合毛利率，按年下跌近3個百分點。對於呢類薄利多銷型公司，營業額達數百億元，毛利率每跌一個百分點嘅損害都唔講得笑。
國美其中一個難題係佢嘅電子商貿業務仲流緊血。Prof. J覺得每個企業要有亮點之餘，仲要配合本身嘅營運模式。現時公司除咗面對行業減價戰外，自己仲陷入「自相殘殺」嘅局面。減價係惡性循環，網購減價，令以前享有較高毛利嘅實體商店亦跟住減。結果兩個營銷渠道並無產生協同效應，仲成為競爭對手，令業務模式流血不止。
當然，國美覺得自己夠大隻，捱得過用減價戰去搶市佔率，仲學埋容祖兒隻歌一樣加大力度搞推廣。推廣係要嘅，但Prof. J覺得如果國美可以先針對性地處理核心業務模式嘅問題會更好。譬如重新審視電子商貿嘅定位，到底能否切合公司經營需要、點樣同實體商店達到相輔相成等。呢個先至係由基本開始。繼續追蹤，出發！
香港大學電子金融服務榮譽助理教授 徐燦傑