以前啲人崇洋，覺得西洋嘢特別高人一等，但時移世易，風水輪流轉，依家輪到老外學番我地嘞。話說全球第二大礦商力拓近日請咗風水師傅上佢哋個上海辦公室睇風水，仲擺咗隻玉馬雕像喺個辦公室度，希望可以為佢哋消災祈福咁話喎！
絲絲聽講呢隻玉馬雕像高一點二米、長一點六米、寬零點三五米，仲用咗鋼框架鑲嵌住玉嘅表面，以奔騰之勢安放喺土紅色水面之上，而成個雕像就坐落喺力拓位於上海會德豐廣場四十樓嘅辦公室。
力拓中國區董事總經理鮑誼安話，佢哋設計個辦公室嘅時候，請咗風水師傅上嚟指點迷律，話如果放隻喺水面上奔馳嘅馬喺度，有助吸陽氣入嚟，保佢哋喺中國市場入面風生水起，生生不息，欣欣向榮喎。大師仲話，隻馬要俯瞰靜安寺，而且一定要放喺水上面，因為「水」為「財」。
其實風水呢家嘢，信則有，不信則無，不過力拓自○九年以嚟喺中國嘅發展的確諸事不順，嗰年中鋁注資入力拓嘅交易告吹之後，仲有四名管理層被捕，而喺中國市場嘅市佔率逐漸被競敵必和必拓蠶食，想喺中國呢個重要市場「撈得掂」，用番中國人嘅玄學嚟沖吓喜都無可厚非嘅。