長江基建（01038）嘅項目分布世界各地，為咗謀劃新一年嘅業務計劃同預算，每年十一月都會班齊各地成員公司嘅管理層喺香港開會。
不過長建近年收購動作多多，成員公司有增無減，今年嚟開會嘅人數差唔多接近100人，絲絲聽聞，長建今年嘅會議要開足1個禮拜先搞得掂。
為咩開會要開咁耐？原來係長建嘅老總甘慶林，要同成員公司逐間嚟開會！自然要花多啲時間。至於海外嚟嘅管理層，其實就唔使喺香港留足1個禮拜咁耐。
咁多海外老總長途跋涉嚟到香港，食宿方面梗要好好安排吓。不過呢方面就難唔倒長建，事關長和系旗下有大把酒店，呢次嚟開會嘅海外老總，都會安排喺港島同埋紅磡嘅海逸君綽酒店落腳。