絲絲講場：法興籲「歐豬」法式減肥

歐債危機肯定係近年投資界最關心嘅議題之一，但搞來搞去咁多年，啲負債國同啲經濟強國不斷為咗「財政平衡」而拉鋸。法興環球經濟部主管兼董事總經理Michala Marcussen就以「減肥」嚟比喻目前嘅拉鋸，佢仲話自己偏好法國式嘅「減肥」餐單添。

其實聽咗咁耐，絲絲相信大多數人都知歐債依家仍處於不斷需要妥協嘅地步。德國、法國呢啲強國雖應承借錢出嚟，但又唔想啲負債國繼續「洗腳唔抹腳」；而希臘呢啲「歐豬國」又驚一次過削赤「太痛苦」。

Michala就好巧妙咁話，佢自己對歐債問題嘅睇法，就好似揀「減肥」餐單，一個人唔應該一直「暴飲暴食」，但亦唔能夠「完全唔食嘢」；所以佢鍾意法式「減肥餐」，多過德國式「減肥餐」，唔知準備緊大選嘅德國政客明唔明呢？