感恩節雖然係美加嘅大節日，但原來唔少外資大行喺香港都會同員工一齊慶祝，好似瑞銀就喺尋日感恩節，由一眾管理層夾錢，訂咗6隻火雞同大量美食，慰勞一班手足咁話。
有份夾錢嘅瑞銀亞洲股票衍生產品銷售部董事總經理于正人（Johnny）話，佢哋部門老闆係美國人，近幾年都有叫到會慶祝。錢唔係花好多，但重點係可以同員工歡度節日。
絲絲諗番起，上個月先至傳話瑞銀全球大裁員成萬人咁多，成個投行界當時震撼到呢，幾咁擔心個裁員風會正面吹埋嚟香港，當時絲絲都有向Johnny八吓瑞銀香港嘅情況，Johnny嗰時話對公司大裁員並唔知情，又話瑞銀喺香港嘅輪證部門若以成交量計，喺香港市場排行第一，兼且佢哋3個月前先請多咗人，所以佢對部門前景有信心咁話。絲絲依家睇番，Johnny果然講實話。
喺環球嘅員工陸續被請食「無情雞」嘅時候，香港嘅手足反而安然有老細請食火雞，確實係「這個感恩節不太冷」。
其實，自從港股喺今年三月延長交易時段後，瑞銀嘅香港手足嘅食飯時間得番1個鐘，Johnny同其他做輪嘅同事日日食飯盒，食完後睇兩睇報紙、同事間傾幾句，眨吓眼又到一點開市，又趕又無啖好食。尋日係港股「加時」後第一次感恩節大食會，係少有嘅人山人海場面，佢哋直頭有人話「多人到好似年宵咁」。絲絲心諗，瑞銀香港嘅手足今時仍然可以溫溫暖暖咁喺度o趙火雞，又係咪要「感恩」延長交易時段多咗交易呢？
余詩韻