雖然最近內地遊客消費力弱咗，不過啲舖租仍然有加冇減，做高價消費嘅都真係幾閉翳。即使好似米蘭站（01150）咁，雖然有個大股東、主席兼CEO姚君達呢位物業投資高手做後台，都好似冇乜SO喎！絲絲睇番資料，姚生有舖租緊畀米蘭站，之前就話荀價租出，依家要收返「正價」喇。
米蘭站前晚披露同姚生續租咗兩間舖頭，分別喺銅鑼灣同尖沙咀，明年起嘅新月租，就分別加到59萬同16萬元。嘩！加幅係九成同五成咁多。不過，有地產老友就同絲絲講番，其實呢個價屬於市價，就以銅鑼灣嗰間嚟計，呎租都係2千零蚊，而其實同區有唔少舖位呎租都超過3千蚊，所以姚生呢個價都唔算進取喇，只不過係之前租平咗，依家追番個升幅都正常嘅。
話雖如此，早前米蘭站預警今年業績見紅，絲絲好關心佢嘅租金壓力會唔會好大？公司就透過公關話，會致力維持租金佔收入比重一成內，仲話會優化門市組合。小股東惟有耐心等吓。