絲絲講場：塞舌爾航空好快飛嚟香港
想趁放假去旅行又唔知去邊好？不妨考慮吓著名嘅塞舌爾，持有中國護照仲免簽證添。絲絲講緊嘅，就係連英國威廉王子同王妃凱瑟琳都去度蜜月嘅潛水天堂，嗰度除咗有海龜、魚類同埋珊瑚外，好彩嘅話仲有得睇鯨鯊！話說塞舌爾航空（Air Seychelles）前排訂咗第2架空中巴士A330-200，當交付完畢同埋通過審批後，打算喺二月初首推來回塞舌爾同香港嘅航線，博食埋農曆新年假水尾。
經濟位5千蚊有找
行政總裁寶克萊（Cramer Ball）話目標係每周有3班停阿布札比嘅來回航班，機程大約13個鐘，航程喺傍晚六點出發，晨早七點唔夠就到塞舌爾；會喺下晝三點半於塞舌爾回程，第日朝早喺香港八點左右落機。佢初步估計經濟客位價錢大約係600蚊美元（約4,680港元），雖然機票唔係貴，但就唔係廉價航空，佢哋仲曾經同國泰（00293）、香港航空初步磋商，希望可以推出合作優惠。