絲絲聽啲北京朋友講，銀河證券北京金融街營業部，一向視門前嘅大石牛係吉祥物，但尋日隻牛失驚冇神成隻瞓低咗，佢倒地時仲將旁邊建行門口嘅玻璃打爛埋。啲網民直頭話，呢個係A股嘅大凶兆，股市唔掂仲累埋銀行。唔通尋日真係凶日？
網民話隻石牛之所以「悲壯地倒下來」，全因為隻牛終於頂唔順大盤嘅壓力而倒下，意味牛市被徹底打敗，中國股市冇得救，仲話A股可能會探底1,600點。真係講到有咁恐怖得咁恐怖。
有人仲話，呢個時候應該要換番隻石熊上去。佢哋究竟係諗住攞景贈興？定係想「以毒攻毒」，靠隻石熊趕走熊市？
尋日滬指再次跌破2,000點大關，熊市氣氛持續瀰漫。不過亦有樂觀嘅網民話，「牛倒」其實同「福倒」道理一樣，正所謂「福倒、福到」，「牛倒」即係「牛到」，仲唔係天降祥瑞，寓意牛市重臨？
咁，真正嘅事主銀河證券金融街營業部又點睇？佢哋就叫大家咪鬼咁迷信，話其實係隻石牛日久失修，隻牛後腳有啲唔受力，先會跌低。佢哋已經搵咗吊車拖走隻牛，仲整緊隻新嘅大牛，大概一個星期大家就會見番門口有隻大牛啦。答得都好正路，不過，絲絲仲係覺得，寒寒哋。