長實（00001）上月中宣布分拆旗下四家服務式酒店的Horizon上市。傳聞已通過港交所（00388）上市委員會聆訊，進入最後大直路，直衝上市終點。Horizon今次以合訂證券（即係商業信託）形式掛牌，最大賣點就係派息穩定。盛傳Horizon會將一二至一四年可分派收入，全數醒畀股東，而其後嘅分派，亦將不少於可分派總額90%，估計Horizon嘅息率會介乎4至5厘，單睇條款，都好似幾吸引。
不過，單以股息而決定實在太膚淺，投資者反而應該留意同佢掛鈎嘅業務。不論條款點保證派息比率，學《無間道》話齋：三年後呢個世界可能又係另一番光景。Horizon經營服務式酒店，現金流屬於較高穩定性，而服務對象主要係優皮一族或來港工作嘅外地專才。呢類型服務式酒店就啱晒心水，唔駛煩之餘又有完善設施。
然而，投資者要考慮服務式酒店行業往後嘅發展，呢啲套餐優惠能否繼續吸引嗰班租客呢？如果未來經濟逆轉，公司福利可能有所改變，咁呢班租客仲續唔續租呢？
至於長實今次採用合訂股份形式分拆業務，而唔用REITs（即房地產信託基金）來上市，估計係由於酒店負債率偏高，如果用REITs，就無法符合法定負債比率不高於45%嘅要求。Prof. J就覺得無需大驚小怪，長實如何安排旗下業務上市，當然有佢嘅原因同作用。
喺市況不明朗下，穩定派息可以係一個吸引因素。但Prof. J都係嗰句，如果想捧李超人場，始終心水都係偏好長實或者和黃（00013）呢兩間核心公司。繼續追蹤，出發！
香港大學電子金融服務榮譽助理教授 徐燦傑