現代教育（01082）主席吳錦倫（Ken Sir）尋日好勞氣向絲絲呻，話公司半年盈利下跌皆因嶺大附屬學院超收「搶客」，他估計私校因為咁少收咗成幾千人，不過相信事件只屬一次過，至於「三三四」新學制實施嘅影響現時難料，雖然流失中七班學生，但有中五及中六班學生增加彌補，相差缺口唔係咁大。
現代教育早前以2,000萬元認購聯夢活力（08100）可換股票據，將會同深圳書城合作搞電子書、青少年培訓中心同電子教學系統，佢預期明年開始有錢賺，暫時未有增持計劃。
至於內地幼兒園業務，Ken Sir計劃喺韶關、東莞同江門，3年內每年加開兩班，不過因為收齊k1、k2同k3學生需時，要賺錢相信仲要等等。
另外，Ken Sir仲有唔少新諗頭：包括會搞留學中介中心，又話要再訓練多兩三個名師嚟刺激吓收生添。
唔講唔知，Ken Sir早幾個月喺美國未出QE3之前拍板買入信和中心兩處物業，依家計落賺唔少，班股東當然開心。
既然Ken Sir咁有投資眼光，咁佢對新股翠華又點睇？Ken Sir反而話，佢以前成日幫襯翠華銅鑼灣店，係幾有水準，最愛係佢哋嘅墨魚丸河喎。