手機系統Android上個月推出最新4.2作業系統，沿用番4.1系統嘅名Jelly Bean，本應係可喜可賀，之但係，絲絲就發現新系統竟然犯咗個超低級錯誤：一個內置通訊app「People/Contacts app」，喺2012年竟然只得11個月，12月離奇消失咗，間接殺死埋聖誕老人！
今次出事嘅呢個app，係Android Open Source Project （AOSP）嘅出品，仲要係內置嘅程式，唔少用戶upgrade咗作業系統之後，喺通訊錄入資料嗰陣，居然撳極都搵唔到今年12月，2012年11月之後就直接跳去2013年嘅1月，一大堆12月嘅紀念日呀、生日呀、同埋絲絲每年最期待嘅聖誕節等，都好神奇咁，無晒！
Android Police就話呢次「消失的12月」問題源頭，可能出現喺一大堆java檔中，系統處理「0」同「1」嘅時候出現錯誤。雖則話有bug係好常見嘅事，不過絲絲就覺得，Google喺QC方面真係可以做得好啲囉！
網友寸Google用瑪雅曆法
有網友直頭笑話，Google可能係參考瑪雅族日曆，因為知道2012年12月22日可能世界末日，所以索性剔走個12月﹗亦有人笑話，Google話得11個月就係11個月，係錯都係日曆嘅錯咁話！雖然Google話已經知道呢個問題，但絲絲睇嚟，好似仲未見佢解決，Google今次真係老貓燒鬚。