絲絲講場：熔盛投向海洋搵明天

唔經唔覺，熔盛重工（01101）已經上市兩年，向來都幾樂於同傳媒溝通嘅佢哋，尋日更加筵開4席，由CEO陳強同CFO王少劍主持大局。首先嚟個兩年業務回顧，而重頭戲當然就係講解吓啱啱成立嘅海事子公司，絲絲趁機了解吓佢哋嘅海洋工程發展前景點先。

剛剛1個月前，熔盛重工喺新加坡成立咗子公司熔盛海事，畀王總形容為係大腦，而南通基地就係身體，互相配合海洋工程業務嘅發展。王總話，預期造船業短期內都唔會好轉，所以海工係公司重要嘅戰略，今年就公布咗得到第一張訂單，佢仲話相信好快有第二張單添，而呢項業務個門檻比較高，對業務前景有信心喎！

講開又講，當年熔盛重工上市價係8蚊，但由於大環境麻麻兼有負面消息，股價不斷向下插，最低跌到唔夠1蚊，小股東若果係上市時買嘅，咁就真係呢！惟有耐心啲等吓，今回就寄望喺海洋工程身上，或者有機會出生天！