諾貝爾經濟學獎得主蒙代爾（Robert Mundell）有名你叫「歐元之父」，當提起佢個仔嘅時候，大家即刻諗起嘅，當然會係佢有關「最優貨幣區」（Optimum Currency Areas）研究而推動創立嘅歐元喇！但你哋又有冇聽過佢個親生囝囝Nicholas呢？
蒙代爾年屆八十，15歲都未夠嘅Nicholas係佢同現任太太Valerie所塑造嘅高質素藝術品，佢同前妻Barbara都生過三個小朋友。歐元之父真係好錫阿Nic，睇佢為○七年北京一個諾貝爾獎得主論壇題辭時，都引用阿Nic講過嘅金句就知。最近絲絲問起阿Nic，蒙代爾就好雀躍咁話：「佢好靚仔！佢依家已經有我咁高，遲啲應該仲高過我。」絲絲心諗，阿Nic應該迷死唔少女仔，於是八吓佢係咪好多女朋友，蒙代爾就只係笑笑口唔出聲。
蒙代爾係國際著名學者，Valerie又係詩人，阿Nic當然承繼到優良文化血統，細細個就開始學中文。蒙代爾曾經話一直冇停過畀囝囝學中文，試過專登請老師每星期同阿Nic上兩次堂，仲帶佢去中國住，等佢親身感受吓語言氛圍，將來喺中國有所貢獻咁話。
講開崇尚中國文化嘅國際級大師，絲絲不得不提「商品大王」羅傑斯，佢出名係中國「大好友」，佢話早年已預期中國會主宰世界，所以安排年僅9歲（Happy）同4歲（Baby Bee）嘅囡囡喺新加坡學中文，佢哋自幼由中國裔保姆照顧，依家除咗識用中文自我介紹，仲識唱普通話兒歌同唸唐詩添。呢啲大師嘅二代，唔知將來大咗會點呢？
余詩韻