Market Insight：長城汽車 夠晒賣點

回到香港，留意A股先確認到，白酒股原來係反貪腐個「Put」。十八大塵埃落定，總書記習近平第一次演說，承諾要人民過着美好生活（唔知包唔包括合理價買到茅台！），誓言解決貪污腐敗，儘管兩會制訂「三公消費」限制，不過反貪腐威力顯然無今次演說咁震撼。

內地茅台酒指標，以53度飛天茅台為主，剛跌穿1,400元人仔，同去年同期比較得番六成左右，囤積貨源的酒商見炒濃散貨不絕，同時官員消費預期減少，劉伶預測春節後隨時見1,200元人仔，酒災味道濃厚。內地幾隻白酒股近日跌幅唔細，昨日仲有些少災味，貴州茅台、五糧液、瀘州老窖最多跌介乎7至9.3%。

放大圖片

放大圖片

小注翠華博食番餐

咁啱得咁蹺彤叔揸重貨、專門幫五糧液做經銷的銀基集團（00886），朝早炒高，最後收報2.77元升0.17元，以為跌咁耐有死貓彈會有好嘢跟尾，點知收市後彤叔申報，上周三減咗596萬股，持股量降到7.58%。內地白酒市場短期似乎無甚起色，加埋銀基唔少機構股東坐重貨，最怕人人爭出貨搞到人踩人。

講番股事，上周五美股連跌四日後拗腰，彰顯美國國力，兼科技股精神領袖蘋果公司，同日隊到500美元邊最後神奇倒升，魚缸客當然feel good，信心大增。三隻排隊上市新股，古勝最頻光顧也最感興趣肯定係「一生一世」翠華（01314），留意到唔少專欄認為定價太進取，PE比大快活（00052）同大家樂（00341）高一截，昨日打給buy side老友一問，意外地保薦行今次相當招積，講到明配售部分未必夠分，係吊高嚟賣抑或趁散戶嫌貴基金圍晒飛？抱住小注怡情，都係要抽小小博掛牌日有胡可食。

國產車企銷情理想

滙控（00005）正在商討減持平保（02318），客觀睇交易合情合理兼對兩者有利，大笨象頭寸輕鬆之餘，有離心股東早走早着，對平保亦屬好事。等同H股40%街貨量巨型配售，肯定要中央審批，事先咁張揚，有點古怪，以往外資公司大幅減持內地金融股，往往由中資機構接番大部分，但今次咁大規模邊個啃得落？看來就算成事都有排拖。

汽車股當炒，早前提過東風集團（00489）因中日關係緊張，銷售數字搞到市場跌晒眼鏡，相反，本地車企在事件中直接受惠，例如長城汽車（02333）第三季就多賺1倍，達14.88億元人民幣，早前公布的十月份市佔率，進一步增加4.3個百分點去到45.1%，加埋下半年長汽兩款新車「哈弗H7」及「哈弗H2」推出，今年下半年至明年上半年，相信業績都會持續亮麗。

十一月股價由21元起步，升到24.55元，整固超過兩星期後，昨日又見發力，重返24元樓上收市，一二年市盈率12倍，汽車股中唔算最平，不過賣點夠力加埋基金換貨揀無日味的股份，今次破位應該有機會見26至27元，值得留意。

潤燃發揮注資效益

冬季係燃氣銷售旺季，加上今個寒冬可能為時較長和較冷，燃氣股吸引炒家目光，昨日見新奧能源（02688）及北京控股（00392）同升逾1%，剛獲染藍的昆侖能源（00135）則升逾3%，與華潤燃氣（01193）股價同創52周高位，潤燃高位見18.52元，收報18.46元，升幅4.5%。

潤燃於今年八月宣布購入母公司16個管道燃氣項目，注資效益顯現料可進一步帶動盈利增長，盈利前景能見度高。以現價一三年度預測市盈率20倍計，估值唔算係好昂貴，走勢呈強自必有其原因。

古勝