絲絲講場：中信秋拍晒30億奇珍
澳門中信一二年秋季拍賣會將喺下個月廿六至廿八日舉行，今日喺香港做最後一日巡展，絲絲尋日去咗見識下。批拍賣品總估值達三十億元，共四百七十三件，最貴一件珍品係明洪武朝青花纏枝牡丹紋龍耳瓶，估值達三點六億元，澳門中信國際拍賣公司董事局主席黃志煥話，成交價十億元唔出奇。
「賭聖」葉漢珍藏搶手
今次拍賣會有大概二十件屬於澳門「賭聖」葉漢嘅私人珍藏，相信唔少人會為沾沾「賭聖」嘅霸氣同運氣，而出手競投。賭聖嘅珍藏，包括一枚中華民國二十四年孫中山帆船壹圓銀幣，估值介乎六百萬至八百萬元。黃志煥話，嗰個銀幣全球僅得兩枚，另一枚收藏喺上海博物館。
巡展有一道元代成吉思汗虎頭令牌，暫只供展覽，估值未定，當年成吉思汗就係用呢道令牌，嚟指揮千軍萬馬打天下，全球只得一件，全人手製造，含金量達百分之八十五點五。由於屬「國寶」級，傳聞國家落咗指令，買家唔可以將令牌流放海外，國家文化部甚至有意買下該道令牌。