絲絲講場：VS天使騷熱爆 商機無限
絲絲有個好私密嘅至愛，有佢緊貼住，絲絲既係天使，亦係魔鬼。呢個絲絲至愛，係年銷售額逾61億美元嘅品牌，就係Victoria's Secret（VS）。若你連VS都唔識，絲絲都幫你唔到！VS下月四日將會舉行一年一度嘅內衣show，到時Victoria's Secret嘅專屬天使超模們（VS Angels）將空群而出，而呢個show係美國CBS電視台現場直播，以及喺Cnbc.com作網上直播，美國政商界將會出席，絕對係星光熠熠。
全球十億觀眾(目及)實
呢個內衣show嘅直播時間係美國東岸時間晚上十點正，近年facebook和YouTube都已經會同步直播嘞！其實呢個Show每年慣常都係11月就會上演，只不過今年撞正總統選舉年，惟有讓路喺12月初先至舉行。VS嘅年度內衣Show目前喺全球估計至少已經有10億名觀眾，商業價值你話幾咁厲害。
通常每年內衣Show上演嘅時候，亦都係配合萬聖節同埋跟住嘅聖誕及新年嘅節日銷售季節，一眾天使超模着上新款超級性感嘅內衣，但係並唔係單單行天橋咁簡單。
絲絲收到風，今年亦都會係以不同主題戲劇嘅舞台表演形式，主題包括有天使馬戲團，一班天使超模會大玩美式雜技（American Acrobats）同埋吞劍絕技（Sword-Swallowers）；至於ending嘅「Angels in Bloom」就梗係今年最Top、最上鏡及最當紅嘅超級天使超模齊齊Show up啦！今晚你想見到天使定係魔鬼？想睇雜技定吞劍？