絲絲講場：上市委雙煞雷厲峰行
近年有啲新股嘅質素呢，大家睇到啦！負責把關審批新股上市嘅港交所上市委員會，更加要金睛火眼(目及)到實。絲絲最近同投行界朋友傾開計，佢哋就大呻話近月新股要上市過關「好難」。唔講唔知，上市委員會近年多咗兩個猛人入局，一個係舊年加入嘅雷剛，一個係今年至加入嘅鵬誠峰。
雷剛係香港主要私募股權集團之一UCL嘅董事總經理，鵬誠峰就係來寶集團Corporate Affairs董事，鵬誠峰更加係上市委員會副主席。
提問刁鑽「賓架」喪膽
佢哋兩位老外出咗名超認真，喺上市委員會提出嘅問題深入兼刁鑽；咁都唔單止，佢哋唔會好似一般專業人士咁，好似「填表」咁睇吓公司做咗乜、做咗物，佢哋仲會從經營生意角度，睇吓間公司點樣經營，盈利點樣可以維持等。
佢哋態度絕不馬虎，令到上市委員會依家審批公司上市時，往往辯論連場，除咗開會時勁加長外，聽聞依家無論港交所上市科職員、同banker等都「聞風喪膽」，準備充足，唔敢求其去應付佢哋深入刁鑽嘅問題。
細行難應付「冇運行」
有市場人士就話，大型投行尚且可以應付，細行由於未必有足夠人手同資源，遇上咁頑強嘅把關人，可能要花上多幾倍時間應付，直接啲講，即係「冇運行」！事實上，絲絲聽聞上市委員會就曾經推翻咗幾個上市申請添。
絲絲就覺得絕對係好事，事關近年新股上市冇耐就業績大走樣，股價又潛水，香港散戶多，上市委員會睇緊啲，都係保障投資者啫！
余詩韻