絲絲近排發現一個美國點評網站Yelp喺當地非常受歡迎，佢哋主要提供地道嘅店舖資訊同用家嘅點評，○四年創辦到依家，對診所、餐廳、花店、時裝店等嘅點評已超過3,300萬個。公司亦已經喺紐交所上市，舊年收入8,300萬美元。
聽創辦人Jeremy Stoppelman講，佢最初萌起設立網站嘅念頭，竟然係因為一次感冒！「當我仲喺哈佛讀書嗰陣，有次唔舒服要去睇醫生，網上僅得好少相關嘅資訊，極挫敗！於是我就諗到，要搵信得過嘅醫生，或者其他服務，最好都係靠口碑。」就係呢個突如其來嘅靈感，Stoppelman同佢一齊喺PayPal做軟件工程師嘅舊同事Russ Simmons，兩個就喺一餐晏晝飯時度掂條橋，仲喺即日下晝將條橋sell畀PayPal創辦人Max Levchin，而攞到100萬美元嘅彈藥。
Yelp今年9月更加喺亞洲插旗，首先揀喺新加坡落地生根，仲致力發展智能手機Apps，公司話有45%嘅搜尋都係嚟自手機。睇得出Yelp雄心壯志，兩年前Google曾經想收購Yelp，可見公司潛力幾大，之不過最後Stoppelman都無應承，佢話佢最有熱誠想做嘅，係將啲人同身邊嘅本土小店聯繫起嚟，佢仲話永遠都唔想Yelp只係成為一件價高者得嘅商品，既然唔想賣，就只有上市嚟保持獨立咁話，認真係有志氣！
之不過，Yelp愈做愈大，搞到開支仲多過廣告收入，但仍堅持唔收用戶錢，今年第三季仲蝕緊200萬美元。絲絲衷心希望呢間咁有heart嘅公司可以轉虧為盈，愈做愈有。