黃偉康（Andrew）喺舊公司敦沛證券做咗一年冇耐，就轉咗去自己有份投資嘅靈獅控股，仲做埋行政總裁，不過又係做咗一年左右就離開，仲以為老友藺常念話做到無癮想退休，於是佢又走埋一份。原來，實情係Andrew想自己出嚟搞過間公司。
Andrew依家嘅身份係獨立分析員，佢話見到今年無論做證券定係做資產管理嘅公司都生意慘淡，去到九月、十月「一間摺完又一間」，仲拖低晒中上環寫字樓啲租金。
Andrew話，見到原來投資銀行做私人銀行業務嗰瓣先係最賺錢，咁啱早排瑞銀宣布大裁員，市場多咗班banker出嚟，佢就想自己搞迷你私人銀行，做ＥＡＭ（External Asset Managers）嘅業務。
佢仲同絲絲講，依家已經埋緊班，可能搵番前瑞銀啲banker，因為佢哋有班熟客在手，個倉照樣留番喺瑞銀，但落盤就可以搵番以前相熟嘅banker，從中賺少少佣金。咁樣，一來瑞銀唔使畀錢出嚟養住一大班banker，又唔怕因為換人而流失啲客。雖然私人銀行客買嘅產品都比較保守，但張張單個銀碼都有番咁上下，賺百分之零點五佣金都夠啦。