絲絲講場：HTC大陸吃得開
台灣宏達（HTC）同蘋果公司之間單專利權官司雖然早前和解咗，但係HTC面對蘋果仲有三星呢啲對手嘅劇烈競爭，早已經係不爭事實。之但係，絲絲所見，HTC亦唔係只有敵人嘅。
聯通大讚合作順利
聯通（00762）董事長常小兵呢排喺十八大開會期間，大讚HTC喺內地賣得好，又話HTC與聯通同埋其他內地電訊商合作非常順利，為HTC喺內地嘅前景帶來新憧憬。有外國傳媒直頭提升至政治層面：估話三大中資電訊商今回力撐HTC，係為咗報答HTC舵手王雪紅支持台灣大陸政策喎！
絲絲記得，三星未冒起之前，HTC曾被視為智能手機嘅新興力量，HTC前身Dopod（多普達）更加係內地智能手機市場嘅先驅，無論係HTC，以至王雪紅本人，喺內地一直有好深厚人脈；而聯通、中電信（00728）及中移（000941）又一直都係國際手機商力爭嘅合作對象。外國傳媒將HTC嘅內地合作關係，同中央嘅對台政策拉埋嚟講，絲絲話，佢哋會唔會諗多咗？
5.8%市佔率贏iPhone
事關內地嘅聯想（00992）、中興（00763）同埋華為等，依家其實同HTC與同屬台商嘅宏碁等，喺內地同埋國際市場正鬥個你死我活，台灣智能手機要重振市場優勢，唔通又要內地對手讓賽咩！
絲絲睇番市場調查，今年第三季HTC喺內地市佔率雖然只得5.8%，但係以手機銷售數量計，HTC已足夠跑贏蘋果iPhone喺內地嘅銷售，可見內地市場對HTC幾咁重要！同三大電訊商保持盟友關係，點都係利好HTC嘅未來。
余詩韻