Market Insight：大唐發電追落後首選

九月前威風八面的美股，踏入九月中旬即大玩變臉，道指由13,661點高位至今累積跌近千一點，9日RSI去到20.5的極超賣水平，標普五百及納指，一樣唔好得幾多去到21及22。至於彰顯美國國力的蘋果公司（Apple）股價，9日RSI也去到接近的23水平，自iPhone 5推出後，蘋果公司在705美元歷史高位開始插水，隔晚見536美元，揸一股都輸咗半部iPad mini，下個月十二、十三日聯儲局議息前，美股可見利好消息唔多，「財政懸崖」又非一時三刻可解決，只怕聖誕前美股都會持續死吓死吓，間中死貓彈的尋底局面。

下一支持50日線

恒指昨日跌333點收報21,108點，主板成交529億元，比周三多46億元，沽空佔主板成交9.59%，是本月以來最多，潛伏多時的淡友有再度活躍的迹象。

放大圖片

放大圖片

意料之外是，中共十八大塵埃落定，近期內地又狂批新QFII額度給一眾外資行，可是對A股刺激作用如泥牛入海，滬綜指隊到個半月低位見2,030點。經昨日一跌，恒指10日線搭住20日線作勢出現所謂「死亡交叉」，技術上，下面較有力的支持是九月升浪的0.382調整支持位約20,975點，這正好同50日線的20,978點十分接近。

港股焦點肯定係思捷環球（00330）前大股東邢李（火原），突然趁供股權證拉閘前大手翻兜，思捷股價昨勁升22%收報12.96元。由打工仔進身時裝公司老板，能夠見好就收，趁思捷業務環球化最輝煌一刻，分段減持套現210億元之後全身而退，締造股壇佳話。但到底邢李（火原）是不忍一手建立的江山兵敗如山倒，希望攜手再創高峰，抑或純粹在套現所得攞個「零頭」出嚟支持吓？

用電量明顯回升

歐美消費市場大不如前，Zara等對手今時唔同往日，咁艱難環境下救唔救得番Esprit，古勝就唔係太睇好。昨日咁挾法，應該同近期唔少基金表明放棄供股，唔少淡友在11元樓上積極沽空，急急補倉有關，最高興莫過於滙豐及瑞銀兩個出到「硬包銷」的投行，筆包銷費可袋袋平安。

跌市中，華能國際（00902）卻逆市而行創三年半新高，中國公布十月份社會用電力按年增長6.1%，比九月多3.2個百分點外，也是七個月以來最高，由工業用電明顯反彈所見，內地經濟活動復甦，正帶動電力需求回升，配合動力煤價由去年大幅回落，電力股業績也從第一、二季燃煤成本回落帶動，去到第三、四季，售電恢復較快增長牽引。

華能創新高，反觀大唐發電（00991）有點令人失望，今年累積升7%同華能的53%相比，輸幾條街。近一季的大行評論，主要針對大唐的單位燃料價格回落幅度不及華能，睇番兩股估值，華能一二年PE回升至11.8倍，反觀大唐仲停留在9.3倍，折讓兩成二，問題應充分反映，昨日成交初見增加，有追落後之勢，唔貪心，定低啲目標睇一成至一成五升幅。

「送禮股」不再吃香

中國新一屆領導班子亮相，魚缸維穩力量完成任務，A股低收1%，港股跟跌，中資股普遍向下。早前奢侈品股曾現反彈，炒家製造嘅理由之一係內地新領導班子底定，由「十‧一」延後嘅官場送禮潮一觸即發。點知新領導強調反貪反腐，昨日相關「送禮股」即時腳軟，股價亦隨大市向下，其中經銷五糧液嘅銀基集團（00886）股價亦受壓，創52周低位2.85元，收報2.91元，跌3.6%，成交8,526萬元。

面對酒品銷情不明朗，加上最近又多一家上市公司──華藝礦業（00559）話攞到五糧液經銷權，銀基身價被拖低，劉央同彤叔嘅持貨價值亦要跟住縮水。所以話，有時跟住大孖沙揀股，都未必一定係好！

古勝