在熱錢持續流入下，十月底香港金管局不斷入市注資，市場都估到底筆熱錢最後花落誰家？Prof. J覺得今次流入應屬短暫性質，主要為追捧表現落後嘅地區。
要喺港股同地產之間揀，毫無疑問資金流入股市的機會較大。一則因為樓市正受政府出招遏抑所影響；二則恒生指數由年初至今表現都落後其他市場，於是港交所（00388）喺短短兩個月股價就重上半年高位。
再加上奧巴馬成功連任總統，代表美國未來四年會繼續寬鬆貨幣政策，股市預計繼續受惠。Prof. J一直都強調港交所值得長線持有，原因係佢係獨市生意。
雖然港交所業績受收購LME、成交量下滑及新股上市減少所拖累，但呢啲因素理應已反映喺股價上。要知道股價係反映市場對該公司未來嘅睇法，因此喺憧憬港股市場氣氛轉佳下，港交所短期內向好勢頭將持續。
十一月還有備受關注嘅中共十八大及一中全會，市場紛紛聚焦國策板塊，Prof. J就覺得港交所隨時爆冷跑出。港交所其中一個主要收入來自新股上市集資費用，過去幾年間，夠班來港上市嘅大型國企，基本都已經上得七七八八。若非港交所兩年前打開埋國際市場，來香港集資上市嘅企業可能已經無以為繼。
近日再吹風話中證監將放寬內地中小企來港上市門檻，這一來既擴大內地企業集資渠道，又能支持香港新股市場，不失為一個兩全其美嘅安排。不過，之前民企風波令投資者對內地企業提高警覺，呢個如意算盤能否打得響，仲要再仔細考量。繼續追蹤，出發！
香港大學電子金融服務榮譽助理教授 徐燦傑