絲絲留意到，投資公司Foundry Group近日投資咗650萬美元落一個叫Betabrand嘅美國三藩市服裝訂製網站，呢個網站並非一般零售服飾網購店，最特別嘅係，網站用戶可以落手落腳參與產品嘅設計甚至宣傳，用戶不但可以製作自己嘅專屬服裝，仲可以着埋件衫，影番張型仔靚靚相，上傳個網。咁樣畀佢哋做埋設計師兼model，啲用戶好難唔變忠實粉絲啦！
社交網站Facebook創辦人朱克伯格之前喺Facebook上市前路演嗰陣，就專登喺Betabrand訂咗一堆衞衣畀自己同一大班高層着，諗住sell休閒，點知就畀華爾街啲分析師「彈」佢唔專業！絲絲心諗：唔通因為咁，所以今次融資無Facebook份？
不過Betabrand其實都好識做，特登出番一件有帽又有拉鏈、但係個樣又有啲西裝「行政」look嘅幼條紋外套，大概係回應番上次「柴」朱克伯格台嗰班華爾街人，唔知朱克伯格見到會唔會都買番件着呢？
講番今次投資，Foundry Group話睇中Betabrand計劃擴大生產量，由依家每個禮拜推出2至3款新產品，增加到5至10款，而且睇好佢哋喺細規模服裝生產呢一行中殺出一條血路。不過網站暫時只有17個員工，出年夏天先會計劃增聘1倍人手。