年屆68歲嘅聯想控股董事長柳傳志，舊年將聯想集團掌門人之位交畀楊元慶後，大家都以為柳爺從此「收山」，做個富貴閒人。絲絲最近喺上海撞到柳爺，見佢依然落手落腳參與公司嘅重大業務決策，又積極籌備最快二○一四年將聯想控股喺A股上市，不知幾咁忙！柳爺天生工作狂，要佢完全退休，邊度有可能先得o架！
之不過，聯想喺楊元慶打理下，業績都唔錯，最近仲榮登全球最大PC製造商，柳爺對楊元慶都好放心，自然抽到多啲私人時間，過啲半退休嘅寫意生活啦。柳爺份人好健康，一有時間就去打吓Golf，舒展一下筋骨。
閉關苦練Golf決戰
柳爺仲同絲絲講，四月嗰時佢同阿里巴巴集團主席馬雲、中銀香港（02388）獨立非執行董事寧高寧幾個Golf高手，話要嚟番場「世紀之約」。
為咗呢場比賽，柳爺呢兩個月努力閉關修煉，到時要令人眼前一亮，威盡全場。
柳爺半年前仲同一班朋友打賭，講好話大家都要減肥5公斤。柳爺唔單止一早完成呢個減肥目標，仲減多咗2公斤，依家身材不知幾咁fit。
雖然柳爺好享受過住啲寫意人生，但佢個心都仲放喺聯想控股身上，要打造聯想PC市場一哥地位，亦要聯想控股上市之後每年都有兩位數嘅利潤增長，佢份魄力，真係唔講得笑。